Tuesday, December 06, 2005

ماذا حدث للمدونين المصريين ؟؟ فى الفترة من (11-2004الى 11-2005) وكده

على غرار الكتب التى تتناول تاريخنا الظريف اللى منعرفش عنده حاجة
حبيت
انى ابدأ اولى تدويناتى عن الوسط اللى كنت مهتم بيه من زمان و هو وسط المدونات الكريم
ليه بقى يا ابو اسكندر (محسوبكو اسكندرانى) قديم
عشان انا واحد من اول الناس اللى اكتشفت افتكاسة المدونات دى
وكنت اول معرفتها مساء الأنبساط و الأنشكاح
حسيت ان فى ناس بتفهم وان الأمل موجود
( كلام كبير .........صح)
بس اللى حاصل ان دلوقتى المدونات اصبحت نموذج للمدينة بحذافيرها
بمعنى
(ما الدنيا الا مدونة كبيرة)
ما علينا اخوكوا علاقتوا بالكمبيوتر زى علاقة حتشبسوت بشامبو سانسيلك
بس الأيام دى و باعتبار ان كل من هب ودب بقى ليه مدونة

فاعلن من موقعى هذا
فى احد محلات الأنترنت بسموحة
مولد مدون جديد
بس انا بقى ناوى اتخصص ادبيا

ناوى اكون ناقد مدونات بما ان بقالى سنة وشوية مدمن قراية مدونات
مش عارف ابدأ بمين
او اى حدث
بس ممكن اقضيها كلام لغاية ما تطلب